內地筍工試睡員

講到「絕世好工」，原來唔係外國至有，喺內地就有份叫做「試睡員」嘅工作，月薪過萬，返工唔使打卡，入住星級酒店，瞓覺就可以出糧……但大家咪心邪，呢份工雖然叫做「試睡員」，但全無色情成分，而工作範疇就真係同瞓覺有關。

舊年內地某旅遊網站，從7,000名應徵者當中，挑選咗首位酒店「試睡員」莊菁出嚟，佢經過一年努力，終於闖出名堂，最近仲上埋湖南衞視嘅《以一敵百》節目，以成功職場俏佳人嘅身份，大談自己試睡嘅工作，再次引起網民注意。

專業考試

呢位美女「試睡員」究竟喺呢年內做過啲乜嘢呢？原來佢自上任後就四出入住唔同嘅酒店，然後喺網上寫帖點評，另外，仲要回覆網友嘅查詢，而佢嘅點評，除咗酒店嘅價錢外，仲要點評服務、設施、安全、飲食，同埋交通以及附近景點。

由於莊菁做嘅點評十分專業，除咗幫到客人之外，仲可以幫到酒店提高服務質素，於是引起咗中國飯店協會嘅關注，決定同網站合作，擴大「試睡員」嘅隊伍，制訂考試及認證制度，有興趣嘅朋友可以入讀佢哋嘅課程，經考試後就可以投身「試睡員」嘅工作。由於多咗「試睡員」四出調查酒店嘅質素，自然能令業界嘅服務得以提升，今次得到中國飯店協會嘅支持同授權。始創「試睡員」嘅旅遊網站，當然拿拿臨申請註冊啦，相信佢哋好快就會開班，想打絕世好工，大家又多一個機會喇！