熱番啲餸
熱番啲餸
肥寶老婆美華患上感冒，於是他就做廿四孝老公帶佢去睇醫生。而陳醫生同肥寶係相識多年嘅好友，於是陳醫生就問肥寶，係咪成日同美華激戰，搞到佢冇衫着而冷親。肥寶笑淫淫咁話：「講出嚟真係會笑死你！」話說肥寶同美華結婚冇耐，兩公婆不知幾咁煙韌。有日肥寶返工嘅時候，臨出門前美華就問佢：「老公，今晚想食乜餸呀？等陣我去街市買啦！」肥寶諗咗一諗後，就喺美華耳邊輕聲話：「今晚我想食你呀！」美華聽後就大發嬌嗔，輕輕拍打肥寶嘅心口。肥寶騎騎笑後，就轉身出門口返工。
點知嗰晚肥寶臨時加班，搞到三更半夜至返到屋企。肥寶一打開門，就見到美華剝光豬喺客廳度裸跑，肥寶大惑不解問美華喺度做乜。美華邊跑邊喘氣講：「你喺梳化度抖吓先！等咗你成晚，家陣要Warm Up番，等我跑番幾個圈熱番個身，就可以畀你歎o架喇！」陳醫生聽到事情原委後，當堂成個笑到趴咗喺度！