戀愛風俗店先談情後開波

要數日本風俗店其中一樣最吸引顧客嘅玩意，角色扮演一定榜上有名，但其實喺顧客心目中，最吸引嘅角色又會係咩呢？原來據成人網站調查所知，答案並唔係學生妹或者俏護士，而係戀人。有見及此，喺東京就有間風俗店，推出戀愛出張服務，畀客人過吓拍拖癮！

呢間叫做「戀愛白書」嘅風俗店，同其他出張公司一樣，只要客人喺網上揀啱囡囡，囡囡就會自動上門替客人服務。但由於佢哋講求戀愛感覺，所以客人唔會喺酒店開定房，而要喺指定地點等候囡囡出現，拍住拖行陣街談吓情先齊齊去情侶酒店開房。

自由時間

由於風俗店強調服務能提供拍拖嘅溫馨感覺，所以客人喺車站接咗囡囡之後，唔使急住去開房，公司會畀大約30分鐘自由時間客人，同囡囡去行街拍拖，做情侶會做嘅事。唔少囡囡都會提議去遊戲機中心打吓機或者影吓貼紙相，再唔係就去食雪糕，你一啖、我一啖，夠晒Sweet，唔少幫襯過嘅客人都對呢段自由時間讚不絕口，覺得好有戀愛Feel。特別係一啲從未嘗過戀愛滋味嘅宅男，佢哋同囡囡相處期間，真係畀囡囡電到三魂唔見咗七魄。

有人會問，會唔會有囡囡故意同客人喺自由時間玩耐啲，搞到過晒鐘要補錢加時，又或縮短「餘下」服務。負責人則表示囡囡好識把握時間，一夠鐘就會暗示客人去開房，除非客人主動要求要玩耐啲，否則都可以準時入閘。其實呢個時候客人已經暈晒大浪，囡囡話去邊、做啲乜客人都唔會反對啦！

短訊冧客

而呢間風俗店最煞食嘅地方，就係囡囡會於事後Send甜蜜短訊畀客人，通常都係以下呢幾句，例如：「我已經平安回到公司，你要好好休息……」、「很高興認識你，希望天天都見到你……」、「我很想你，甚麼時候可以再見？」客人收到呢啲短訊唔對囡囡魂牽夢縈都幾難，於是就會經常幫襯，所以呢間風俗店啲生意愈做愈好，仲長期客滿。

此外，囡囡亦會喺網上寫日誌，大談今日同客人嘅拍拖經驗，當然事必有讚冇彈啦，好多客人睇見囡囡讚佢哋表現出色，都感到非常開心，於是隔冇幾耐又會走去幫襯，同時更會間接招來一啲冇幫襯過嘅網友，令佢哋躍躍欲試。最正都仲係呢班囡囡，全部都大膽到喺網誌度以真面目示人，令班宅男當晒佢哋女神咁嚟追求，呢間風俗店嘅生意，想唔火紅都幾難！