貴陽掃黃只捉流鶯

十月尾喺貴陽巿，一眾記者同執法人員，齊集公安分局準備掃黃行動，由於事前做足保密工夫，唔好話記者唔知道要去邊，連大部分嘅執法人員亦唔知掃蕩地點，經上級開會後，結果竟然係動員過百人去橫街窄巷搜捕流鶯！

記者們當時都好愕然，點解唔係去掃夜場，打大老虎？但行動在即，惟有跟大隊照去。去到棗山路、北京路同半邊街一帶，記者坐喺車上觀察，發現真係有幾百個囡囡喺度等開工，一字排開，場面墟冚。

通街捉雞仔

最後各執法人員兵分幾路，喺一聲令下，一齊衝出去捉雞仔，最後埋單總共捉咗150個流鶯，而喺附近出租屋進行緊交易嘅，就拉到4對，全部被控以嫖妓同賣淫罪，行政拘留同罰錢就一定唔少得，而據報道，流鶯嘅年齡由16歲至50歲都有。

網友睇到呢單新聞，居然有人質疑有關方面嘅做法，事關當地星級夜場林立，既然勞師動眾，點解有大老虎唔打，只係走去捉雞仔，當中有冇涉及利益同包庇，就無從得知。不過今次行動有記者同行，局方都唔做場好戲，真係令人有啲意外。

講到尾，網友關注嘅係呢次只捉流鶯嘅掃黃行動背後，究竟有冇無恥嘅公職人員出賣職責同法律，佢哋仲希望有關方面可以公平而認真正視掃黃工作，千祈唔好成為他人操控嘅工具。