成都招請美女城管

最近成都招募女城管，竟然喺入職要求上面寫上「年輕貌美」，事件經廣泛報道後，自然引起正義網民聲討，質疑佢哋係請公務員，定係招考模特兒？更有口痕網友話，會唔會係啲「高官」落「柯打」，藉此機會尋找小老婆呢？

乘機搵二奶

話說日前成都新都區政務網上貼出一條招聘廣告，公開招募八位城管女子中隊隊員，招聘要求如下：年齡18歲以上，23歲以下，身高1.60米，必須五官端正，形象好，氣質佳，如果只睇招聘要求，一定會以為係招考模特兒或者影視明星，但原來係招城管。

「城管」一詞，可能好多朋友都比較陌生，其實等同香港嘅食環署，佢哋要管衞生、管小販、管巿容等工作，內地近年就經常發生小販同城管嘅流血衝突事件，所以招聘城管要求，你話要武功高強或者能言善辯，都好合理，但家陣竟然只招靚女，就有啲講唔通。有網民胡亂推測，會唔會係長官要求，希望搵班靚女，方便自己揀小老婆，亦有人話係要嚟擺喺成都旅遊景點，做親善大使，挽回城管嘅形象。

改善形象

最後當地傳媒派記者訪問人事科長，先知道呢八位靚女城管，真係負責做形象大使，主要喺新都景區內嘅大廣場駐守，一方面負責城管工作，二來亦做親善大使，希望改變城管喺旅客同巿民大眾心目中嘅形象。如果請幾個人就可以改變形象，香港啲販管隊就唔使成日畀人插啦，本質上唔改變，就算搵周迅同范冰冰嚟做宣傳大使都冇用。