動漫Model愈高愈高薪

內地好多城巿都會舉行動漫節，好似早前喺東莞同廣州舉行嘅動漫節，就吸引數十萬人次捧場，可謂盛況空前。同一時間兩個城巿都搞動漫節，對動漫女郎嘅需求當然唔少，而當地嘅職業介紹中心，就喺動漫節前日日招人。有網友發現，有某啲參展商，竟然以身高嚟計算動漫女郎嘅人工，身材愈高，人工亦愈高，真係聞所未聞。

鶴立雞群

早前昆明某動漫城貼出一張特別招聘告示，表示以¥1,200底薪+佣金招聘動漫模特兒，若應徵者身高超過160cm，每高2cm即可加¥200底薪。有人可能會問，如果應徵者身高172cm，咁咪可以有雙倍底薪？會唔會誇張咗啲。

但有行內人及經常出席動漫節嘅龍友表示，因為身材高挑嘅動漫模特兒唔多，如果全個攤位只得幾個普遍身高嘅模特兒撐場，只要攤檔稍為多人啲，就會遮住晒佢哋，即使模特兒嘅裝束幾咁特別，外圍嘅途人都睇唔到，變相令攤位吸引力大減。若然模特兒身形夠高挑，就冇呢個問題，所以參展商畀多少少錢搵高挑模特兒，其實好平常，只係大家唔理解先至會少見多怪啫！