火上加油

肥明係城中知名富二代，屋企大把錢，當然風流成性啦！即使阿爸安排佢同斯文大方、持家有道嘅富家女慧敏結婚，肥明亦一樣經常背住老婆搞搞震！今日，慧敏生日，特別要求肥明帶佢去睇艷舞一開眼界，肥明見大家結婚咁耐，都需要尋求新刺激，於是就帶慧敏去到相熟嘅艷舞場睇表演！

一入到艷舞場，經理非常殷勤咁上前招呼肥明，仲問：「肥先生，歡迎光臨，係咪坐番你坐開張枱呀？」聽到經理咁講，慧敏塊面已經黑黑哋。到艷舞開始，脫衣舞孃隨住強勁音樂扭動嬌美胴體，然後將身上嘅衣服逐一除低，每除一件衣物嘅時候，台下嘅男人就瘋狂叫喚：「畀我！畀我！」脫衣舞孃就會將衣物拋畀對方。到脫衣舞孃除剩條底褲嘅時候，就好風騷咁向台下觀眾問：「條底褲畀邊個好呢？」全場男人異口同聲大嗌：「梗係畀肥先生啦！」

呢個時候，慧敏怒不可遏，即刻奪門而去！肥明追出去，拉咗慧敏上的士。回家途中，慧敏指住肥明嚟鬧：「你個衰人，返到去有排你受！」此時，的士司機就話：「咦！肥生，你今晚呢件好潑辣喎！」慧敏聽到之後當場激到暈低……