美女做餌引房奴

仲記得好多年前，內地人取笑我哋香港人只係識得炒樓炒股，搞到樓價貴到買唔起，買得起都要一世為供樓而苦惱，唔似佢哋有塊太公地，鍾意點起樓都得！不過，家陣佢哋就知道我哋嘅苦況喇，因為內地樓價同香港一樣飛漲，好多人都變成為層樓努力打工嘅房奴！

雖然係咁，內地樓市依然暢旺，較早前四川南充市仲有一個大型房交會舉行，除咗樓房新盤，仲銷售埋裝修、燈飾、家居用品等等，為想置業嘅朋友提供一條龍服務！當然，家陣大家都知道做房奴辛苦，要佢哋有意欲入嚟睇樓，唔多唔少都有阻力！所以，參與展銷嘅單位就決定出奇招！

除咗請到一大班演藝人到場表演歌舞以及演奏之外，更加出動埋注目度極高、每次出現都必定能夠惹起男士駐足觀看嘅人體彩繪模特兒！其中一個展銷單位派出高挑貌美嘅模特兒性感上陣，再由繪畫師用顏料寫上銷售樓房嘅名稱，利用美色吸引大家注意，一個唔該或者會有準業主落疊，呢招都幾高明o架！