假處女賣淫團

早前昆明搗破咗一個以「處女」作招徠嘅賣淫集團，但其實內裏囡囡全部係假貨。原來呢個賣淫集團於2005年已開始運作，起初只係做普通明買明賣嘅賣淫勾當，但因為客源中有唔少係外地觀光客，嫌囡囡鄉土味太濃，令佢哋喺肉金上都唔可以叫價太高，以致獲利有限。

豬血扮落紅

為提高利潤，負責人於是將手上嘅囡囡，包裝成「處女」以作招徠，但到醫院修補處女膜，費用高昂，於是佢哋諗到利用豬血、黃鱔血等，混合化學物質，然後注入海綿內，再塞入囡囡體內，等客人「開苞」時見到囡囡「落紅」，企圖瞞天過海。

呢班囡囡嘅「開苞價」由五百至一萬元不等，集團多年來據講已獲利超過三千萬，為逼真起見，佢哋更會教授囡囡如何應對，好等客人問起賣處原因時，可以扮可憐，博客人將肉金加碼。

最近呢個賣淫集團被瓦解，造假手法亦同時曝光，網民紛紛斥責佢哋自製嘅「處子之血」，成分不明，分分鐘對人體有害。估唔到繼假雞蛋、假豉油之後，再嚟假處女，內地不法分子嘅創意，真係唔到你唔服。