難以瞄準

據網上消息顯示，話說陝西師範大學長安校區，最近改裝女廁，並於日前竣工，從外觀睇落就美輪美奐，因為以粉色為主色，但當女生一入廁所，就發現唔對路，因為裏面只得一個尿兜，坐又坐唔到，踎又高得滯，唔通要學男生咁企喺到小便？冇錯！呢個廁所就係專為女生而設嘅站立式尿兜！

由於女生企喺度小便較難瞄準，所以學校喺廁格內放置大量導流杯，幫助小便！即係女生要小便嘅話，就要利用導流杯放近尿道口，讓尿液從導流杯直接流入尿兜內，真係聽到都覺得麻煩。所以廁所裝修完後，都冇乜女生肯用，而事件曝光後，更引來網友大肆批評，話校方本末倒置，冇事搵事嚟搞！

有網友更話如果為咗慳水，不如每個女生派隻杯，小便後再將收集得來嘅尿液攞去淋花。但有網友就話學校花錢改裝三個廁所，只係為咗宣傳，爭做環保先鋒，多過實用價值，惟有寄望見好就收，咪再改裝落去啦！