娜娜話：「你老公都係40幾歲，機能上又冇咩障礙，其實可以透過進補改善體質！」美莉好高興咁問：「咁點補法呀？」娜娜徐徐道來：「畀啲提高精力嘅食物佢食囉！例如人參、蟹、蝦、生蠔、鰻魚囉！」

美莉聽完後雞咁腳去街市買齊所有可以增強精力嘅食物，再用心下廚。當肥寶返屋企嘅時候，就見到美莉已經煮好成枱餸等佢，肥寶見平時都冇乜機會有咁多好嘢食，梗係坐低搏命「擦」啦！食完晚飯之後，美莉就話：「我去沖涼先喇！」

當美莉沖沖吓涼之際，肥寶就係咁拍門話：「忍唔住喇！我褲都除埋喇，畀我入嚟呀！」美莉心諗：「真係見效喎，老公咁快就想要喇，好嘢！」美莉一開門就想抱住肥寶嚟個擁吻，不過肥寶竟然衝去馬桶，仲話：「一次過食咁多嘢，真係好易肚痛！」