大家一定以為呢啲係學生嘅義務工作，咁你哋就大錯特錯，原來全部都係「有償工作」，即係要索取報酬嘅。

由於今年升大學嘅大多數都係90後嘅年輕人，佢哋從小就受到父母溺愛，要過獨立生活往往難以適應，人生路不熟之下，有啲家長惟有陪學生前往學校報到。

全套辦妥

但父母要搵食，辦好手續後就要離開，惟有畀錢子女等佢哋自己搞掂，於是有學生睇準呢個商機，為新生們提供包搞掂服務。只要你由火車站出嚟，各大學嘅學長就會上前兜搭相認，接載你到大學，帶你辦手續，再安排你入住宿舍。如果喺宿舍要安裝私人網絡，佢哋可以一個鐘內安好；嫌家具唔滿意，佢哋又可以幫你全部換晒佢，所有生活用品只要你開聲，佢哋都會幫你買得到，連女生嘅化妝品、內衣褲同衞生用品，佢哋都樂意代勞購買，可以話照顧到生活嘅每一面，而呢啲學長就可以從中賺取外快。

如果有父母同行，見到學長咁幫手，往往不介意花錢請佢哋照顧子女，即時多咗份長工添。據講，一個學長如果有四個新生喺手，月入可達四、五千人仔，而據聞有部分男生，更會乘機搵女友添，有錢搵又有女溝，難怪咁多人爭啦！