08/09/2010

播放本新聞相關短片

烏克蘭 半裸遊行慶獨立

好多地區因為歷史遺留下來嘅問題而喪失主權,對此我哋香港人亦感受甚深,話晒想當年香港都曾經係英國殖民地。不過十幾年前,香港已經回歸中國,每年都會舉辦大型活動慶祝回歸。情況於烏克蘭亦差不多,不過佢哋就係慶祝烏克蘭脫離俄國獨立。

出位抗議手法

今年係烏克蘭獨立第19周年,慶祝活動當然有唔少,然而最令人注目嘅,就一定係由烏克蘭女權組織FEMEN發起嘅示威行動喇!FEMEN成員經常都會玩花臣惹人注意,繼五月尾為咗聲援「藍水桶抗議者」,抗議俄羅斯禁用藍色車頭燈而於雙乳上繪畫水桶圖案後,七月時又於首都基輔嘅獨立廣場當眾沖涼嚟抗議政府停止為市民供應熱水,今次佢哋再次出招,而且仲更加激烈,因為佢哋成班女成員於獨立日當日,齊齊露兩點。

爭取露點權

今次露點除咗為獨立紀念日贈興之外,最重要嘅目的就係爭取女性於公眾場合可以同男士一樣裸露上身嘅權利!而為咗擴大活動範圍,今次佢哋仲一邊坐摩托車遊行示威,一邊露兩點拉橫額。手法同上月於美國舉行嘅「全國無上裝日」異曲同工,如果香港嗰啲人權組織都發起呢種爭取女性裸露權嘅活動,我一定瞓身支持啫!

Max