懷疑造假

據網上資料顯示，呢張橫額喺上畫期間掛出，上面寫住凡嚟睇戲嘅都有贈品，而且一次過買四張飛，贈品又會名貴啲，仲有一句：「島城美眉，只要你敢秀，敢穿比堅尼來觀影，我們免費請你睇。」幾日後，網上出現「比堅尼睇戲」嘅帖，話有幾個靚女真係響應號召，着比堅尼入場睇戲，啲相除咗有囡囡排隊換票之外，仲有入場後睇緊戲嘅相，令人相信着比堅尼去睇戲真係可以唔使錢。

但照片一出就遭到網友圍攻，有衞道之士痛罵院商賣弄女性胴體嚟造勢，但有心水清嘅朋友，就話網上嘅照片有造假之嫌，為何睇戲冇其他觀眾？再睇清楚，戲院裏面除咗嗰幾位比堅尼靚女之外，更係空無一人，擺明係「做枚」！咁多破綻畀人捉到，呢次宣傳可謂相當失敗，呢條橋唔知係戲院自己諗嘅定係發行商諗嘅呢？