做得Model，梗係要有番咁上下高度，近年興起嘅一眾o靚模，平均高度都唔夠5呎7吋，點睇都唔係好夠台型，更令不少前輩級Model揚言要同佢哋劃清界線。而今次介紹嘅倪慕斯就唔同嘞，擁有5呎9吋身高嘅佢，三圍平均，配合一對修長美腿，行起貓步時自然更入型入格。
實戰經驗豐富
今年只得19歲嘅倪慕斯，於2006年入行，佢曾參加過某雜誌舉辦嘅封面女孩大賽，於華北賽區奪得前8名，又曾奪得時尚雜誌嘅「最佳上鏡獎」及「最佳氣質獎」，仲喺第2屆中國國際廣告模特兒大賽中入選最後10強，最威水都係喺第57屆世界小姐中國北京賽區奪得分站賽冠軍，實力可見一斑。
講到工作經驗，除咗拍廣告同擔任產品代言外，呢位美女更曾做過汽車女郎，以及大大小小嘅走秀演出，年紀輕輕已經擁有咁多實戰經驗，可謂前途無限。
身材平均
好多人都認為倪慕斯嘅樣貌比較成熟，而且上圍只得B Cup，冇乜睇頭可言，之不過站於模特兒嘅角度嚟講，呢啲根本唔係問題，事關專業模特兒講求嘅係身材平均、高挑，三圍太突出反而未能演繹出衣服本身Style。而且倪慕斯更擁有一對44吋長腿，每次着上超短熱褲或短裙時，都能夠將呢種美腿誘惑發揮得淋漓盡致，難怪佢喺內地模界嘅人氣有增無減。