早幾日喺哈爾濱舉行嘅一年一度國際車展，由於被喻為中國五大車展之一，所以吸引不少海內外嘅車廠參展。今次會場有成九萬五千平方米，要吸引來賓嘅注意，就一定要出動美女模特兒幫手，於是喺六月開始，已經有廠商四出搶邀美女車模助陣。
衣着密實
據網上消息透露，有幾間知名進口車商，更開出天價請嚟唔少薄有名氣嘅模特兒，喺車展七天內助陣，令會場星光熠熠。由於高質模特兒供不應求，除咗搶高薪酬外，班模特兒仲要求多多，除咗食好住好外，更要求毋須露肉。
所以今次車展嘅模特兒，靚就係靚，但個個都惜肉如金，衣着密實，最多都係露雙手臂同膊頭咁大把，令唔少記者同龍友大失所望。
至於一啲搵唔到靚女模特兒嘅車廠，就只可以各出奇謀，有人搵嚟舞蹈學校嘅學生喺現場載歌載舞，希望吸引來賓駐足觀看。有出位嘅參展商仲搵嚟「裸繪車模」助陣。
赤裸上身
當嗰位囡囡一企出嚟，隨即吸引唔少來賓同龍友嘅目光，除咗靚女本身年輕貌美之外，佢仲赤裸上身，只喺胸部畫咗兩隻栩栩如生嘅蝴蝶，每當佢扭動身體時，胸口兩隻蝴蝶，亦隨之起舞，令人嘆為觀止。
而為咗令圍觀者喺展區逗留耐啲，囡囡每企15分鐘，就會返埋一邊畀畫師再畫啲新嘢上身，一畫就要成30至40分鐘，之後靚女再企出嚟畀大家欣賞。如是者又畫又企，令唔少客人企足幾個鐘，達到車商嘅宣傳效果，真係估唔到一個裸繪靚女，竟可力敵天價車模，今次呢間車廠仲唔威晒！