29/07/2010

播放本新聞相關短片

前女公安整容炒作

本文重點
早幾日,鄭州法院西街嘅菜巿場裏面,突然有個衣着時尚嘅靚女推住三輪車喺度叫賣豆腐,靚女除咗喺度賣豆腐外,仲喺車頭掛咗個牌寫住「女大學生賣豆腐,盼整形美化人生」,由於標題吸引,所以引起途人圍觀。

靚女叫賣唔夠半個鐘,豆腐亦只係賣出咗唔夠半板,就有記者到場採訪,靚女即刻同傳媒朋友打招呼。佢自稱小雅,今年25歲,自細就想入娛樂圈發展,但因為身材唔夠標青同埋對眼太細,所以多次試鏡都被拒諸門外。

網友拆穿真相

小雅為咗自己嘅夢想,於是毅然賣豆腐籌錢整容,希望可以創造美好人生,表面聽落好似好勇敢,但經網友人肉搜查後,發現小雅背景一啲都唔簡單。佢父母經營食品公司,本身則畢業於公安院校,仲喺父母嘅安排下於高速交警部門工作過。

所以小雅原來係「公安師姐」,呢個身份令佢嘅新聞價值大增,但有網友懷疑,小雅冇理由冇錢整容,仲要搞到賣豆腐嚟籌錢,會唔會係存心炒作呢?經過網友深入調查,發現網上有關小雅新聞嘅帖,有好多都係出自高人手筆,懷疑幕後有人獻計。

更有網友發現,小雅賣豆腐當日,身邊有個女人不時提點佢,經調查發現,個女人係當地某美容醫院嘅員工,於是有人懷疑今次事件,係美容醫院同小雅合作炒新聞,消息一傳出,小雅即刻冇晒新聞價值,內地網民嘅人肉搜查,果然厲害!

達達