上個月內地有間泳衣生產商，喺北京藝術園區798舉行咗個2010最新泳衣發布會，當日一共展示咗四個系列嘅新款泳衣，出動近百個中外靚女模特兒行貓步。有咁多靚女以性感泳衣示人，自然吸引唔少記者同龍友到場，未開騷已經逼滿會場。
玲瓏浮凸
雖然係內地生產商，但佢哋嘅設計一啲都唔簡單，原來佢哋花咗近十年嘅時間，將內衣與人體工學相配合，設計出可以令女性身材更靚嘅內衣同埋泳衣，所以好多模特兒嘅身材都變得玲瓏浮凸，令龍友們鼻血直流，唔少龍友事後貼圖時，都大讚好嘢！
但如果事情係咁簡單就冇嘢值得講啦，話說有網友愈睇啲香艷照片就愈火滾，仲上網抨擊話今次嘅泳衣騷實在太過火。原來北京嘅798園區，係唔少藝術家雲集嘅地區，佢哋喺度從事藝術工作同展覽作品，令呢度充滿藝術文化氣色，係北京藝術嘅地標。
賣弄性感
是以近年798園區成為遊客必到景點，人流多咗，自然多咗商業活動，卻不失藝術本意，但今次泳衣展，與藝術風馬牛不相及，而且有賣弄性感之嫌，於是引起部分網民嘅反對聲音，喺網上狠狠批評！
其實類似嘅性感騷，以前都舉辦過唔少，只不過冇今次咁大型，坊間反應咁大，就因為活動照片喺網上廣泛流傳所致。今次嘅演出咁好，相信同類型嘅活動喺園區裏面會陸續有嚟，我哋除咗拭目以待靚女們嘅傾情演出之外，仲可以睇吓啲網民，日後仲有啲乜嘢反對行動！