林柯彤今年22歲，以「小龍女彤彤」嘅外號，喺攝影模特兒界走紅，被譽為「網絡第一美女」。近年除咗做模特兒外，更參演了最新版《西遊記》電視劇嘅演出，可以話係人氣新星，如果林小姐真係控告「天上人間」，睇嚟賠償金額會十分可觀。

假囡囡資料

有網友再追查佢哋嘅網頁，發現除咗封面造假，將林柯彤嘅網上照片，做成版頭之外，原來佢哋裏面嘅囡囡介紹欄，亦有大部分所謂嘅囡囡係造假嘅，唔少都係湖南某電視台選秀節目《星姐》中嘅選手照片。但「天上人間」畀人查封後，多位負責人一直潛水，呢班可憐嘅苦主，睇嚟想討回公道都幾難，特別係彤彤，佢話得知事件後，想盡辦法都聯絡唔上對方，於是利用網絡進行譴責。

好彩嘅係竟然有反應，有關負責人於幾日後就將網頁嘅版頭照片換咗，但對彤彤嘅傷害始終無法改變，睇嚟徵求過法律意見後，彤彤就會採取進一步行動，為自己嘅聲譽討回公道。