本來空姐植樹都冇乜特別，但竟然引嚟網友嘅強烈批評，到底所為何事呢？喺今年3月12日，嚟自某航空公司嘅30位美麗空姐，齊集到西安大明宮遺址公園，一齊參與當地嘅植樹活動，佢哋個個身穿整齊空姐制服，然後喺公司高層嘅一聲令下，分為每兩個一組，開始參與植樹活動，數十株樹苗，轉眼種植完成。

本來空姐參加植樹活動，應該受到表揚，但有網民就喺討論區內發出強烈批評，而且加入聲討行列嘅朋友仲不斷增加，原來所有事都係同空姐當日嘅服裝有關。

疑為誘惑

網民認為空姐去植樹，應該換套運動裝或者便服，唔明點解一定要着住套制服，莫非想上演制服誘惑？聽落又好似幾有道理！

有人話咁做係幫公司宣傳，但網民反駁話所有航空公司都有自己嘅工作服，質問空姐點解唔着，反而要着制服高踭鞋嚟植樹。

睇番新聞圖片，空姐們着住高踭鞋嚟植樹，真係有啲唔方便。其實空姐植樹早有先例，為博得媒體注意，以前仲會要求空姐着上短裙，今次啲空姐選擇全體着褲，已經「文明」咗o架喇！