「主人，請問你有乜嘢吩咐呢？」聽到呢句說話，大家可能以為去咗日本嘅女僕咖啡店。不過大家知唔知道，原來想同女僕有近距離接觸，唔一定要飛去日本，去上海都同樣可以呢？
侍應客人零交流
原來喺去年年底，上海嘅浙江路出現咗一間女僕咖啡店，該店店員嘅女僕裝、服務嘅態度同咖啡店嘅環境，都同日本嘅一模一樣！店內嘅服務員，個個更係精挑細選嘅靚女，對宅男嚟講具有相當嘅吸引力。
不過該店嘅女僕只提供侍應服務，唔會好似日本嗰邊咁陪玩啤牌、捉棋同傾偈等。對於想同女僕有進一步交流嘅宅男嚟講，可以話有啲失望。
主打年輕客人
據該店店長王卉辛表示，由於呢種女僕咖啡店源自日本，故此對內地市民嚟講，感覺相當新鮮，相信假以時日，呢類型咖啡店相信會不斷增加。不過王卉辛亦坦言，女僕服務唔係每個市民都接受到，尤其對年長嘅人士嚟講，呢種主人式嘅服務，唔多唔少會讓佢哋覺得唔自在，故此光顧嘅顧客亦以年輕人為主。