不定期舉辦比賽

呢間位於山林道嘅上樓吧「Single Club」，一入場就發現人山人海，座無虛席。呢度面積頗大，環境都幾舒服，VIP房、卡拉OK等基本設備都有齊。採訪期間，娟娟發現喺酒吧嘅左邊逼滿人，於是就走埋去八卦吓，發現有飛鏢迷正在較量。

阿蚊嘅鏢齡雖然只有半年，但技術不俗。

阿瑩熱愛掟鏢，仲話歡迎大家同佢較量吓喎！

有客人向娟娟表示，呢間酒吧不嬲都係鏢迷集中地，更不時舉辦相關活動，讓客人有機會大展身手。期間遇上靚女阿瑩同阿蚊，原來佢哋都係呢度嘅常客，經常同其他客人比賽掟鏢。雖然兩位靚女嘅鏢齡只有半年，但實力卻有番咁上下，唔少男士都輸畀佢哋，想挑戰兩位靚女的話，不妨落嚟碰吓運氣，睇吓遇唔遇到佢哋啦！