本文重點
曾經聽過身邊一啲朋友話想入行做酒吧，但因前途問題而打消念頭。其實，只要係正當職業，加上肯學肯做，總會有成功嘅機會，正所謂行行出狀元嘛！好似早前喺尖沙咀一間清吧遇上嘅靚女Carrie，佢現職酒吧經理，公餘時間仲自發性學調酒，實行自我增值。
工作態度佳
位於棉登徑嘅「Cupid」，係一間清吧，環境舒服企理，絕冇烏煙瘴氣嘅感覺，客路亦比較斯文，啱晒鍾意靜靜哋摸吓酒杯底嘅朋友。期間，娟娟遇上靚女經理Carrie，發現佢談吐溫文有禮，待客態度一流，而且仲非常好傾添！傾落先知，原來Carrie喺呢間酒吧工作只有數月時間，但已經認識咗唔少熟客，大部分客人都好滿意Carrie嘅工作態度，唯一投訴係靚女太專注工作，唔可以經常陪大家一齊玩。
學調酒增值
此外，原來Carrie仲好好學，最近自學調酒，雖然未及得上正宗Bartender，但一般簡單嘅特飲都難佢唔倒！娟娟亦曾試過由佢調校出嚟嘅「Double J」，飲落酸酸甜甜，口感好似沙冰咁，更有濃郁嘅荔枝及雲呢拿香味。Carrie咁叻女，難怪酒吧老闆同大家都咁鍾意佢啦！
Cocktail推介
Double J
主要成分：Vodka、荔枝酒、雲呢拿酒及橙汁。
價 錢：$50
部分啤酒$198/半打，於Happy Hour時段，部分啤酒、Cocktail、紅酒、威士忌，買一送一。