內地80後嘅城巿年輕人，因為冇乜兄弟姊妹嘅關係，所以欠缺同人溝通嘅技巧，令唔少正值青春年華嘅男仔，好多都識唔到女仔，被迫做「宅男」，於是內地近年就舉辦咗好多教追女仔嘅培訓班，最近廣州亦搞咗一個，仲話明要將學員培訓成「搭訕教主」。
學習溝通技巧
所謂「搭訕」就係同陌生嘅異性傾偈，但由於好多人欠缺溝通技巧，所以一直識唔到女仔。而最先揭露呢個現象嘅就係台灣作家鄭匡宇，佢出咗一本《搭訕聖經》，喺內地十分熱賣，而佢更被網友封為「搭訕教主」。
其實喺廣州之前，內地有好多城巿都辦過呢啲培訓班，反應都十分熱烈。其實呢啲班主要都係教大家點樣搭訕識女仔，學員經培訓後，溝通技巧大為改善。
增強自信心
培訓班分理論同實踐課，理論課主要講心理準備、衣着打扮同埋搭訕時開場白等技巧。到咗實踐課就要出街實戰，通常都會一敗塗地，事後主辦者就會鼓勵學員報讀精進班，收費由一千到四千元不等。
至於精進班則會更深入，由講嘢咬字、話題探討等都會幫你執晒，畢業後學員係咪真係做到「搭訕教主」都仲係未知之數，但起碼溝通能力同自信心會強咗先啦！