本文重點
最近內地高調打擊色情手機網站，而且全國性咁大掃蕩。原因係有不法分子用假公司登記開設手機網站，販賣色情資訊，包括短片、相片、文字、遊戲，連真人錄音嘅色情笑話或者鹹濕古仔都有，而且巿場十分龐大，發展短短一、兩年間，其資產值估計已經超過幾千萬元人民幣。
朋友互發亦違法
加上很難控制未成年人士使用手機上網，例如有好多學生喺課堂公然用手機上網登入色情網站瀏覽，事件引起社會廣泛關注，有關方面決定整頓全國手機網絡，打擊所有色情手機網站。
而大家要留意嘅，係有學者話除咗網絡發布外，朋友之間發放色情資訊，都係屬於違法。至於喺自己手機內藏有色情資訊係咪違法，亦眾說紛紜，所以喺風頭火勢下，家陣北上玩樂為免中招，還是將手機內嘅鹹相、色情短片等統統刪除為妙！