酒吧Disco二合一

位於寶安區嘅「No.×9」，係一間以美式懷舊為主題嘅酒吧，面積過千平方呎，內裏有唔少復古裝飾，配合華麗嘅吊燈，感覺更有格調。其實呢度亦算係一間「D吧」，即酒吧同時具有的士高元素，佢設有小型舞池，現場更有DJ打碟，加上駐場Dancer表演助興，確實為客人增添唔少歡樂。此外，呢度仲有多位駐場歌手獻唱，一邊聽歌、一邊飲番杯就至有Feel喇！

頻搞活動

聽聞呢間酒吧於該區頗受歡迎，客路比較斯文，絕對唔會有烏煙瘴氣嘅感覺，亦係唔少港人喜愛嘅玩樂地點。而酒吧不時都會舉辦特別活動，好似跳舞比賽、超級大話骰遊戲等，間中仲會出現卡通公仔打扮嘅Dancer同大家一齊玩，場面相當熱鬧，直頭好似開Party咁過癮！