好快又到一年一度嘅盛事，我唔係話分豬肉嘅樂壇頒獎典禮，而係一個充滿歡樂嘅大型籌款盛事。不過，我成日都會諗，咁多歌星明星呼籲我哋市民有錢出錢，有力出力，但係年賺少則過百萬、多則過千萬嘅明星又有幾多個真係身體力行出錢又出力呢？英國倫敦有班網絡科技商人，為慈善真係拋個身出嚟支持㗎！仲係齊齊剝晒衫影裸體月曆籌款添！
呢廿四位網絡科技商人，全部都係資訊科技界嘅先驅！今次為慈善一齊剝衫，拍下嘅裸照將會製作成月曆，只賣十英鎊！由於當中有唔少都係年輕美女或俊男，所以月曆相雖然三點不露，但係依然肉光四射，誘惑味濃，絕對值得畀錢支持。
順帶一提，佢哋話今次一脫除咗為慈善，仲想話畀人知，佢哋唔係終日迷戀電腦嘅電車男、電車女，同普通人一樣咁朝氣勃勃！睇完佢哋啲寫真相，我絕對同意。