雖然內地公安嚴打農村演出脫衣舞，但地方太大，呢類色情表演依然屢禁不絕。好似最近網上就有報道指，河南新密來集鎮嘅一個廟會上，再次出現呢種色情表演。一班性感舞蹈員冒住寒風，喺舞台上大跳脫衣舞，引嚟眾多村民圍觀。
慕名而至
據網上資料顯示，喺脫衣舞演出前，已經吸引不少男士慕名而至。到咗上午十點左右，廟會現場已經有幾十人聚集。喺廟堂門口，有幾個負責賣飛嘅男人大聲叫喊，叫人入廟睇脫衣舞，側邊更放有幾張艷女「肉」照。到咗演出時間，喺搭建簡陋嘅舞台上，就有幾個身穿三點式泳裝嘅艷女出場。隨住強勁嘅音樂，邊扭動身體邊除衫，直到剝光豬為止，引嚟現場男士起哄，有人更舉機拍照！
深感憤怒
對於呢種脫衣舞秀，有年長村民感到非常反感，其中一位長者表示，其實每年廟會都會有呢種表演。另外，有不少女村民對於呢種低俗演出，感到相當氣憤，當中有人更曾經當眾將丈夫拖離會場。雖然曾經有村民向有關當局反映，但最終都係不了了之。