網上報道四川有位羅女士，上月廿八日，以一千八百元人民幣購入一支形似壯男何首烏。呢支何首烏身長五十厘米，約重六點一公斤，頭頂部分長滿藤蔓，但奇就奇在生成人形，仲連生殖器官都有埋，似十足一個男人一樣。
價格稍高
據網上資料顯示，發現呢支何首烏嘅地方，係四川犍為縣岷東鄉附近嘅山頭，呢度啲村民話，山上經常都會發現野生何首烏，但通常掘出嚟嘅，一般都係手指公大小，有番薯咁大已經十分罕見，但好似今次咁大支，就真係從來未見過。
由於當地傳說八仙中嘅張果老就係食咗人形何首烏而成仙，所以今次掘出咁大支何首烏，喺當地十分轟動，最後由羅女士以千八元購入，比起巿價唔算貴好多。一般嘅何首烏大約賣三、四百蚊一斤，所以計起嚟價錢尚算合理。
番薯偽裝
但羅女士最擔心嘅，反而係呢支人形何首烏孰真孰假？因為廣東、四川一帶經常都有新聞話掘出巨形何首烏，但全屬偽造，只係一種番薯科植物，由農民倒模栽種而成。
有次更發現一支莖下生出兩個人形何首烏，仲要係一男一女，男嘅性器凸出，而女嘅就胸前偉大，有人更謠傳食咗呢啲人形何首烏可以「以形補形」，結果令唔少人上當。