送遞花箋

以前香港交通尚未發達，主要嘅交通工具就係人力車。佢哋日頭主要喺碼頭車站等候客人，而夜晚就會喺酒家飯館門口出沒。早前本欄都講過，當年塘西妓女「出局」嘅規矩，係要寫張花箋過去妓院，而客人叫酒樓掌櫃寫好張花箋後，就會叫侍應攞落樓，然後託車仔佬送去妓院，據講呢一程係冇錢收嘅。有朋友會問，冇錢收都肯制？原來佢哋去到之後，就可以停正喺妓院門口，等候回覆，乘機(目及)女。

熟悉行情

稍後如果妓女「出局」，就會優先坐佢哋嘅車前往，你話拉個靚女遊車河，邊個唔想，單係索吓陣香水味，就已經值回票價，而且啲「阿姑」出手打賞都好闊綽。由於呢啲車仔佬接觸得阿姑多，慢慢就變成夜遊明燈，除咗本地人會請教佢哋之外，好多外地來訪嘅遊客，喺未去塘西玩之前，都會先向車仔佬打探口風。而車仔佬之間，每日都會互相通報塘西行情，邊處抵玩，邊處靚女多，佢哋都知道晒，難怪被稱為本地夜遊指南界嘅開山老祖宗啦！