話說早幾日我一個人去酒吧飲酒，期間遇到一個索女，佢見我着住一對日本名廠限量版波鞋時，顯得非常雀躍。難怪佢咁嘅反應，事關呢對波鞋係我去日本公幹時，一位大公司老闆送畀我，全球只有三對，真係有錢都未必買到。索女叫我讓畀佢，梗係唔制啦！不過我哋就因為呢對波鞋而打開話題，仲傾得相當投契添！

美色引誘

原來佢叫安娜，當晚大家都玩得非常盡興，飲到酒吧打烊先離開。步出門口，安娜突然對住我拉低衫領嗌好熱，仲話想搵地方沖個涼。睇見佢心口條深坑，小弟弟即時有所反應，於是拿拿臨搵間時鐘酒店落腳。

上到房，安娜即主動撩我打茄輪，跟手一招猴子偷桃，認真曳曳，當我想還擊之際，佢就話要我沖涼先，然後幫我脫去衫褲，仲叫我入去浴室先，佢跟住入嚟。點知隔咗一陣，見外面冇乜聲氣，心知不妙，衝出去睇吓，發現安娜已經失去蹤影，我立即檢查財物，手機同銀包都喺度，只係對波鞋唔見咗。

唉！估唔到我一世英明，呢鋪衰喺條女手上，最慘就係如果報警嘅話，都唔知點樣解釋。所以奉勸大家出嚟溝仔溝女，認真要帶眼識人呀！（完）