形象顧問一直予人對潮流觸覺敏銳，衣着潮爆的感覺，凡人只要一經他們指點，即時潮起嚟，至少心理上係咁覺得！之不過東京近年就出現一班專門服務「宅男」嘅形象顧問，佢哋清一色係女性，外表未必稱得上潮，但身材就弗爆，而且衣着性感，係男人望見都有性幻想。

借題發揮

有鑑於日本「宅男」愈見普及，有色情集團年頭已於成人網站開始宣傳，表示可透過全身改造，「打救」呢班既溝唔到女，又欠缺社交經驗嘅可憐蟲。勢估唔到，「宣傳」一出街相當受歡迎，每日電郵查詢嘅人為數不少，色情集團見有利可圖，於是借題發揮，名正言順推出「形象顧問」玩法。

由見面第一刻開始，囡囡會陪人客去買衫褲鞋襪、潔膚用品、介紹吃喝玩樂好去處，甚至陪打機，所有使費當然由人客支付，而最犀利只不過係為人客設計髮型及親自剃鬚，對於曾拍過拖嘅男士嚟講，以上活動係情侶拍拖嘅指定動作，但對「宅男」而言就非常新鮮！

價錢昂貴

新玩法推出不足一個月，已經甚受歡迎，有傳大部分顧客都係「宅男」一族，其實一啲都唔出奇！皆因過程比起單去風俗店明買明賣相差甚遠。就以簡單一個造型套餐為例，如無特選「顧問」，陪買陪玩陪食，六小時內完成交易，最低入場費都要五萬日圓，埋尾固然有個「飛機餐」送贈。但若然要「指定」顧問，搞晒所有嘢，再去爆房「執一劑」，冇十萬日圓都落唔到樓，計埋吃喝玩樂嘅支出使費，肯定貴過你落日本夜總會起「雙飛」。

話雖如此，呢項顧問服務依然有價有市，電車男依然搶住試玩，一位自稱「松本」嘅宅男，於賽後報告表示，「形象顧問」令佢尋回自己、重拾多年歡顏、做人有目標，誇張過信教！「人生第一次有拍拖嘅感覺，呢種溫馨係普通嫖妓無法搵到嘅！」真係難以想像，一個男人竟然會咁「純真」，偏偏日本就充滿呢啲絕種「純情男」，唔係邊有生意做呢！

着重包裝

可以令宅男們如癡如醉，究竟呢班「顧問」有乜獨門秘技？原來係玩包裝。留學日本嘅玩家阿超就表示有試過「形象顧問」服務，佢認為「形顧」最值得玩之處，係囡囡非常着重包裝，不但外表，連內衣服飾都精心配襯，學足AV女優咁，胸圍顏色非常鮮艷奪目，亦有喱士包邊，而底褲必定係T-back，配埋條超低腰牛仔熱褲，試問點會唔興奮呢！」

阿超嘅「第一次」，據講就係晨早八點鐘，由囡囡陪同去涉谷食個靚早餐開始：「食完早餐，佢就陪我行街買衫，主要都係行商場名店，行到攰就睇戲，之後黃昏就去爆房，最後先食晚飯。過程大家都好投入，但『開心』係要用大量金錢換番嚟嘅！」阿超一試難忘，可惜「代價」太高，但佢表示會儲錢再玩。