吧女之所以喺嗰陣時咁受歡迎，主要同韓戰及越戰有着密切關係。話說當時美國海軍以香港作為補給物資及中途休整嘅地方，水兵上岸少不免飲飲食食、攬女蒲吧，加上轉口港貿易發達，年中有不少外國貨船埋岸，因此造就吧女行業嘅興起。

國際肚皮

嗰陣時吧女乜嘢種族都有，當中包括泰國、菲律賓、台灣等，但最受水手們歡迎嘅卻係陀地妹。事關佢哋質素唔錯，加上數量多，因此生意興隆。另一方面，由於吧女客源甚廣，經常要接待來自世界各地嘅「八國聯軍」，故此呢啲陪坐、陪酒兼陪過夜嘅吧女又稱為「國際肚皮」。

當時呢啲駐有吧女嘅酒吧，亦有自己嘅一套規矩。客人去到酒吧時，係唔可以直接嗌吧女坐低，必須透過酒吧嘅「媽媽生」介紹。此外，吧女亦分為兩種。一種係酒吧自僱嘅吧女，工作內容同依家嘅拳手差唔多，都係支付固定底薪，並陪客飲酒及兼任侍應嘅工作。另一種則係自由身嘅吧女，佢哋冇底薪，收入全靠陪客人飲酒，然後再同酒吧拆帳。

收入甚豐

據講拆帳嘅方法，係客人所點嘅每杯酒，吧女可以分到四成，而酒吧則佔六成，舉例以一杯十蚊嘅酒嚟計算，客人每點一杯，吧女便可以得到四蚊。而按當時嘅行規規定，吧女一坐枱便會點一杯酒，即係只要有人嗌佢坐枱，吧女就有錢落袋。理論上呢種拆帳方法，吧女會好似依家普遍嘅拳手咁，不斷同客人「銷酒」，只要佢哋飲得愈多，吧女嘅收入就愈多。不過當年嘅吧女相當有性格，加上佢哋收入嘅重點並非拆帳，而係同客人闢室尋歡，賺取肉金，故此佢哋一般都唔會太過落力「銷酒」。咁帶吧女出街要幾多錢？自由身嘅吧女要五十港元，而酒吧僱用嘅吧女則要一百港元。至於過夜，就要五十美元，以當年嚟講，價錢都算好高㗎喇！