講到日本最具人氣嘅機械人動漫，相信《超時空要塞》必定係其中之一。為咗慶祝呢套人氣動漫誕生廿五周年，喺○八年時，日本方面推出最新作《超時空要塞Frontier》。故事雖然有啲似舊作，但由於情節緊湊，故此深得動漫迷歡心，而今次介紹嘅呢個模型，就係當中嘅第二女主角雪露。
雪露喺故事中飾演一名銀河偶像派巨星，由於歌聲優美，因而得到「銀河妖精」之名。雪露唔單止唱得，身材玲瓏浮凸嘅佢，經常以性感打扮示人。呢個模型就係採用咗佢喺一個演唱會上嘅扮相設計而成。玩家仲可以將佢身上套制服除落嚟，變成惹火Tube Top造型。睇見雪露如此火辣嘅身材，難怪有妖精嘅美譽啦！
全高：210mm
售價：¥7,140（約HK$595）