局票手續費

「一蚊雞」的確係源於「妓女」，亦係當時塘西妓院嘅「暗語」及有錢人「專利」。喺一九二○年代，華燈初上，有錢嫖客會招呼朋友到酒樓大吃大喝，食過四大碗、四小碗嘅「頭盤」後，就會寫「局票」（又稱花紙），然後找侍應送到妓院，搵「阿姑」陪酒食飯，而每張「局票」會收取一蚊「手續費」，由妓院及妓女對分，久而久之就出現「一蚊雞」呢個詞語！

但大家唔好以為用一蚊就可以叫到「紅牌阿姑」喎！通常呢「一蚊」只叫到啲二、三線妓女嚟陪人客飲吓花酒，聽支粵曲咁就走人，想再進一步，就要同妓院或妓女直接Deal嘞！

醉翁之意不在酒

「一蚊雞」自塘西開始流傳，甚至成為一種玩法，而六十年代尾嘅九龍城寨，就出現不少「一蚊雞試片室」、「一蚊雞踩單車」，統統都同色情有關。前者顧名思義係戲院噱頭，初時為吸引麻甩佬入場睇成人電影而推出一蚊雞試片室，但查實醉翁之意不在酒，男人入內後，自然會有囡囡主動埋身，若然雙方「情投意合」，就可攬攬錫錫，甚至用手「出火」解決。而一蚊雞踩單車，並唔係男女齊齊踩單車咁簡單，而係由囡囡踩單車，麻甩佬睇啱就上車，沿途穿過大街小巷，男人攬住香腰，又摸又摷，享盡手感。而最辛苦都係班囡囡，事關阿妹大汗疊細汗咁踩單車，仲要畀人摷足全程，都係得「雞碎」咁多，真係幾辛苦㗎，難怪呢個咁「浪漫」嘅玩意只係曇花一現，好快就消失咗！