死纏爛打

老友細強同女友返上常平玩，由於女友喺美容店修甲，於是細強就喺附近嘅商場逛吓，期間有個着背心短褲嘅靚女主動搭訕，問細強要唔要按摩，仲話有特別服務，叫細強跟佢上樓睇辦，保證好多靚女咁話。換轉喺平時，細強一定會心動，但呢次有女友同行，只好拒絕，但女方卻死纏爛打，細強發火叫佢走開，佢都唔肯走。

呢個時候細強見到路口有架公安車，於是即時走去搵公安，嚇到個靚女雞咁腳走。公安問明事情始末後，話細強做得啱，有事就搵公安，否則就會墮入陷阱。

利用美色

公安話細強遇到嘅可能係打劫黨，佢哋利用靚女呃人上樓，之後就將其禁錮喺屋內，搶晒對方身上啲錢，再強迫受害者講出提款卡號碼，攞到錢才會放人，但期間最少都要被打一身。最唔好彩嘅就係畀打劫黨拉上車，之後去到荒山野嶺，打劫完仲可能殺人滅口，細強聽後嚇到鼻哥窿都冇肉。

公安話一般雞頭或者小姐兜生意，雖然會主動搭訕，但如果對方個個都唔纏，係要纏住你，咪以為自己行桃花運，其實你已成為打劫黨嘅目標，咁就要小心，留喺人多嘅地方，並立即搵公安。經過呢件事後，細強馬上到美容店拉女友走人，拿拿臨返香港。