優厚待遇作餌

呢個專門招攬女子賣肉嘅網站，經常以招聘私人助理、商務公關、女秘書等巧立名目，雖然有咁多職業供選擇，但要求千篇一律，只聘請女性，年齡廿五歲以下，樣貌身材有番咁上下，初中學歷。但條件待遇卻非常優厚，月入過萬，對內地人士嚟講，呢個數目確實非常吸引，難怪有不少少女上當！

起初，網站會先透過同應徵女士網上聊天，探聽一下對方係咪思想開放或等錢使，若然肯定之後，不法分子就表露身份，以每次肉金六百至八百元嚟氹對方落疊。然後透過網站同手機聯絡嫖客，以減低露面機會，避免執法部門拘捕。

錄影帶作要脅

為求令呢班女子更積極接客，不法分子更會使用一些卑鄙招數，據一位知情者透露：「我識得其中一位受害少女，佢答應咗賣淫集團賣肉後，本來純粹為搵一筆快錢，諗住做十個客後就唔做，點知接咗兩、三個客後，雞頭就表示接到客人投訴，話佢服侍不周，更逼佢接受『再培訓』，喺培訓過程中試盡花式，而且有人用攝錄機拍低整個過程，美其名係教學自用，事後當少女唔肯接客時，雞頭就用錄影帶作要脅，要求少女聽聽話話繼續做落去。」奉勸大家搵工真係要打醒十二分精神，以免墮入陷阱。