廂座談心

「酒帘」最早可以追溯到上世紀六十年代中期，最先喺油麻地一帶興起。玩法雖然同一般舞廳無異，但喺「酒帘」內，跳舞卻變成次要嘅元素，場內嘅舞池亦設計得相當細小，因為玩家去「酒帘」玩嘅主要目的並非攬女跳舞，而喺攬住靚女匿喺廂座中(口依)挹。

原來「酒帘」之所以有個簾字，係因為廂座外面掛有一道色彩繽紛嘅珠簾，用以作為廂座間嘅間隔。由於內裏燈光昏暗，雖然珠簾遮蔽性唔高，但玩家喺廂座內嘅一舉一動，其他人難以從外面得見，夠晒私隱。

盛極一時

雖然跳舞唔係「酒帘」嘅重點，但佢哋卻要求「帘女」一定要識得跳舞，萬一客人興之所至，都能夠滿足得到。「帘女」可以分成「玉女」同「牛女」兩大類。所謂「玉女」又稱為「咭女」，佢哋嘅性格比較斯文溫柔，亦較年輕；而「牛女」則豪邁奔放，身材亦較為豐滿，主要以熟女為主。

由於「酒帘」嘅玩法較舞廳直接，故此頗受玩家歡迎，但亦因此令鐘錢愈嚟愈貴。從初期嘅大鐘一開十二，漸漸變成一開廿四，甚至一開五十。所謂一開十二，即係以六十分鐘為一個大鐘嚟計，將佢除以十二，以五分鐘為一票。如果一票要收一蚊嘅話，換言之，「玉女」坐一個鐘，就要十二蚊。故此，一開五十嘅話，則承惠五十蚊，貴咗成四倍幾。以致「酒帘」嘅生存空間愈嚟愈細，至今已經銷聲匿迹。