五千人仔

據知情者阿輝透露，一直以嚟，淫業集團都有向低收入或剛投身社會工作嘅OL埋手，游說佢哋做兼職，但由於成效不彰，於是有人諗出獎賞制度，希望可以吸引更多OL入行。阿輝話：「據我所知，淫業集團嘅客路大多為身家豐厚嘅富豪二代，佢哋平日好食懶做，又貪慕虛榮，一般夜總會囡囡已經玩厭，所以佢哋特別鍾情OL。可惜，愈嚟愈少OL願意出嚟做，而淫業集團為咗留住呢班富豪客仔，就決定推出獎賞制度，以吸引更多OL入行，聽講獎金大概至少有五千元人仔，呢個數目已等於一般OL嘅每月人工。」

大收成效

自從推出獎賞制度後，果然大收成效，不少OL因抵受唔住誘惑而入行，有OL表示做三個月嘅收入已等於正職嘅年薪。而阿輝就話：「推出獎賞制度的確吸引唔少OL入行，有啲甚至幾個姊妹一齊出嚟做兼職添！講真句，為咗錢放低尊嚴，真係有啲可惜，之不過單靠佢哋原本嗰筆人工，搵兩餐並唔係問題，但係想買大屋買靚車，睇怕撈一世都未必買到，所以又難怪呢班OL肯拋身出嚟做啦！」