較早之前，美國因為金融海嘯搞到雞毛鴨血，市民嘅消費能力大受影響。當然，名錶名車等等奢侈品嘅消費額梗係首當其衝，生意額大幅下降啦！但係，逆市之中總有奇葩，因為好多市民為咗慳荷包，所以決定減少外出消費，咁留喺屋企又有咩好做呢？咪同家人睇吓影碟或者打吓機囉！於是影碟租用服務、電子遊戲等等成為逆市奇葩。

同一時間，收費鹹網嘅生意亦同樣穩步上揚，無他嘅，家陣嘅鹹網真係多姿多采，單身寡佬就最鍾意利用互聯網欣賞五花八門嘅精彩鹹網喇！因此，鹹網嘅生意真係愈做愈大，拍開四仔加上旗下擁有大量知名四仔女優嘅製片商，當然有優勢啦，但係近年亦有公司以集團式經營鹹網，找來美女開設鹹網，專門經營網上裸聊服務，才得以在淡市中突圍而出。

靚女相伴

以往生意唔好嘅時候，當然要大力催谷，但其實生意好嘅時候更加要谷，咁先可以保持盈利。為咗增加各鹹網嘅知名度，同時增強業界嘅交流同合作，所以鹹網業界每年都會搞一個鹹網大集會，而今年就定咗喺八月七日至九日，於美國荷里活一個度假中心舉行。

雖然話呢個鹹網大集會，主要目的係為咗增強各集團之間嘅合作，但係同樣歡迎普羅市民參加，因為市民對鹹網嘅認知率愈高，愈可以吸納佢哋做客仔，生意額自然可以提升啦！所以，今次嘅大集會為咗令吸引力提升，各集團都出盡渾身解數，最簡單嘅招數就梗係出動自己旗下最索、最吸引嘅四仔女優吸客啦！

不過，呢班女優同好多性博覽出現嘅女優一樣，並唔會只係行行企企做花瓶供人觀賞，反而會主動出擊，着上一身性感服飾出場搔首弄姿，向到來嘅參加者拋媚眼、送秋波，總之入場嘅朋友會發覺大集會內不乏四仔女優，套用某便利店嘅廣告Slogan，總有一間喺左近，有時仲會被一班女優包圍添！

一班女優為咗爭生意，會紛紛走上前好似街邊嘅電訊服務Sales咁不斷游說你加入其專屬網頁做會員，欣賞其激情寫真及精彩短片，當然世上冇免費午餐，要睇好嘢就梗係要付出代價啦！所以做會員一律要付費，唔係班女優邊有糧出呀！

玩啤助興

四仔女優們為咗增加自己個專屬網嘅會員人數，增加收入，當然會施展渾身解數陪來賓傾偈，然後再氹對手落疊啦！如果大家身家豐厚，唔介意畀佢哋利誘入會，只介意入會之後會唔會有下文的話，咁又真係唔使擔心，因為四仔女優仲會陪大家玩啤牌！

每年鹹網大集會都會將部分節目外判，而最出名嘅節目就係由Porn Poker Tour（女優啤牌之旅）主辦嘅啤王大賽喇！呢個啤王大賽歡迎各界人士參加，所玩嘅正係近年紅遍美國嘅德州話事啤。

至於呢種德州話事啤點玩法小弟就唔想多講，因為啤王大賽嘅重點唔在於玩牌，只在於每個牌局都有四仔女優一齊陪玩。當然，女優梗係唔會好似其他人咁賭錢啦！咁佢哋又用咩嚟落注呢？就係佢哋身上嘅衣物喇！女優每輸一局就會脫衣一件，直至脫到赤裸裸為止，當然如果大家仲想繼續賭落去亦得，不過要視乎女優肯唔肯用自己嘅身體做賭注喇。聽聞曾經有人抱得美人歸，呢位仁兄一定行緊大運啫！

選美搵銀

賭博好靠運氣，一旦運氣唔好真係好容易輸到清袋，所以奉勸大家都係小賭怡情，即使有四仔女優相伴都唔好咁搏命呀！而且班四仔女優都好忙，因為佢哋除咗要陪客傾偈同玩啤之外，仲要參加選美大賽！

每年大集會，主辦單位都會誠邀各公司嘅索爆女優，又或者希望踏入女優行列嘅美女參加選美大賽，只要將自己最索、最自信嘅一面展現出嚟，再得到評判賞識，就有機會奪得女優合約一份，以及現金獎，即係話佢哋可以藉此進軍鹹網界，成為黃色網絡女神！所以，唔少女優以及志願者紛紛踴躍參加。

當然，主辦單位就梗係算過啦！搞個選美會花費唔少，要維持成本就一定要從其他門路搵錢，所以整個選美過程都會放上鹹網轉播，只要會員交出額外費用就可以收睇，真係佩服佢哋嘅商業頭腦呀！