男人自尊心特別大，令佢哋需要擺出一副堅強嘅外表，再加上種種無形嘅壓力，例如工作、家庭等，早已令佢哋百上加斤。而除咗日常生活之外，男人喺床上面亦有好多忌諱，各位姊妹唔想踩中地雷，就要留意以下內容啦！

忌呼呼喝喝

當雙方肉帛相見嘅時候，首要大忌就係嘲笑男伴小兄弟嘅形狀大小，需知道每個人嘅體形都會因先天或者後天而略有不同，性器官亦都一樣，不能以偏蓋全。如果覺得性器問題會影響性生活，就應該一齊去尋求解決方法，嘲笑只係無補於事嘅做法。而且將心比己，如果男伴彈女伴身材唔夠Fit、個胸唔夠大，畀着你都唔高興啦！

除此之外，以命令式口脗要男伴採用你鍾意嘅方式去服侍自己，呢個做法亦都係大錯特錯，試想像吓成日都畀人呼呼喝喝，話點就點，似奴隸多過伴侶，幾有耐性嘅男人都會覺得反感啦！

中途勿發問

喺入正題嘅時候，唔少姊妹都鍾意問吓男伴「你愛唔愛我」，又或者「你鍾意我啲咩」等問題，想對方氹吓自己，令自己迎接衝擊嘅時候更加興奮。但係當男人埋頭苦幹嘅時候，你無端端問佢呢啲問題，唔多唔少都會令佢分心，因為答得隨意又怕你覺得佢敷衍你；答得猶豫又怕你話佢要考慮，唔知係咪真心，所以好多男人都好怕答呢類問題。加上喺運動進行中，隨時畀你嘅問題嚇一嚇而變成垂頭喪氣，所以如果真係要問嘅話，應該喺完事後才發問。

再戰莫強求

交戰之後，雙方都會消耗大量體力，特別係男方，通常完事後會顯得極度疲累。呢個時候，佢哋通常食完事後煙、沖個涼，又或者瞓覺。相反，女人喺呢個時候就最想男伴可以同自己傾吓偈，按摩吓，甚至再嚟多個回合。所以，有啲女性見到男伴準備上床瞓覺而冷落自己時，就會即刻扯晒火，呢一點其實都係大忌。

因為男女嘅性反應有別，當發洩完之後，男性性興奮會即時減退，加上發洩過後，自然想瞓覺休息。而女人就希望呢份興奮感得以延續，呢個時候女性應該施展挑情技巧，例如輕輕趴喺佢身上，慢慢用手或者嘴唇挑逗佢身上嘅敏感部位，等佢可以藉着你嘅溫柔服侍而回氣，甚至休息一會先再重新作戰都未遲。