夜店林立

位於旺角上海街及豉油街交界嘅「死亡彎角」，相信唔少滾友都會聽過。到底點解會叫呢個名，原因好簡單，以前喺呢區有好多衣着性感嘅囡囡，因趕住去開工，於是喺大街馬路上左穿右插。囡囡着得咁少布，拋胸露腰，鬼死咁索，搞到往來嘅行人都掛住睇女，唔記得睇路，結果經常發生大大小小嘅交通意外。

據一位於上海街開檔嘅盧先生表示，早年喺山東街、上海街及豉油街一帶，夜店林立，而且通街都係妓女，佢哋打扮得濃妝艷抹，衣着性感，旁人好容易就可以分辨得到。好似早年喺豉油街嘅熟食市場，外表只係一般大牌檔，但內裏景象絕不普通，過百個艷女遍布大牌檔內每一張枱，直頭好似變咗妓女飯堂一樣。除此之外，附近茶餐廳嘅熱鬧情況亦毫不遜色，睇見呢個壯觀景象，一般婦女又點敢走入去幫襯？

亂過馬路

當時呢區嘅食肆早已成為馬伕妓女嘅聚腳地，若然你夠膽入去幫襯，間中都會聽見好多麻甩佬嘅有味對白，例如啲囡囡有幾索，又或者一啲賽後檢討報告。除咗形形色色嘅夜店，其實呢區亦有好多時裝店舖。可能你會懷疑，邊度會有人願意嚟呢區購物架？事實上，佢哋嘅目標客根本唔係普羅市民，而係經常出入夜店嘅妓女。

既然有咁多妓女同夜場小姐喺呢區，自然吸引唔少滾友嚟搵食，有時見到對面馬路有索女經過，滾友自不然想睇清楚啲，甚至追上去問價，結果就因為亂過馬路而出事。

但經過一浪接一浪嘅掃黃行動，加上附近早已建成一座大型商場，清拆咗唔少舊樓，昔日滿街妓女嘅情景已經不復見。而豉油街嘅大牌檔亦拆埋，囡囡冇咗聚腳地點，人流當堂少咗好多，死亡彎角亦熱鬧不再。