保加利亞東部有唔少伴侶介紹所，但成功率唔高，大概只有三成男女能夠成為情侶，但多數都係拍拖數月就玩完。經了解過後，原來當地好多男女都唔識得點樣氹另一半開心，於是有人就乘機開設咗一間另類培訓中心，專門教大家點樣溝仔溝女，中心更強調入學者可於畢業前找到男朋友或女朋友，唔會孤伶伶一人參加畢業禮，否則會退回一半學費。
想報讀呢個為期半年嘅課程，首先要出示由診所或醫院發出嘅健康證明，證實自己身體健康冇性病，畀晒學費就可以正式上堂。課程嘅內容包括如何包裝自己、如何發揮個人長處，當然亦包括如何送禮物及以甜言蜜語去冧仔冧女啦！當中最過癮嘅就係導師會安排學員到酒吧、D場或咖啡室等地方進行實戰，至少要喺兩星期內成功取得心儀對象嘅電話號碼先算合格。
此外，中心亦會教導大家各種挑情技巧，好似接吻、撫摸，甚至床上功夫，更有可能安排一啲自願人士嚟到中心，與學員一同實習。呢個課程不但吸引尋找伴侶嘅人士報讀，仲有好多志在玩一夜情或純粹搵性伴嘅單身男女參加，如果有機會，唔知大家想唔想報讀呢個課程呢？
學 費：US$3,000
注意事項：由於課程有可能提供索女或型男同學員練習性愛技巧，所以各學員需要自備安全套。