喺介紹模型之前，先講吓呢部日本長青動漫《超時空要塞》有咩吸引，除咗有出色嘅機械設定外，三角戀及以歌聲維持宇宙和平嘅故事，為不少動漫迷所津津樂道。

作為最新版故事中嘅女主角蘭花，除咗飾演歌姬外，佢本身其實係中華餐館娘娘嘅點心妹。而呢個模型就係以蘭花嘅點心妹造型示人，身穿性感旗袍嘅佢，一對修長美腿表露無遺，而小小嘅高衩更收誘人嘅效果。此外，為咗增加可玩性，隨模型附送點心籠及圍裙，方便模型迷擺出唔同嘅造型。