要投身保險業，首先需要進行培訓，並考取牌照，先算得上做一個正式嘅保險從業員。然而，部分公司急於用人，於是採取先請人後培訓，又或者安排員工邊做邊學。據了解，內地保險公司喺招聘人手時，未必會深入查問應徵者以前從事何種職業。

失業徬徨

居住於重慶市嘅小楠，今年二十一歲，留有一把長長秀髮，樣貌標致可人且打扮入時。佢曾經喺夜場做三陪女郎，收入都唔錯。不過，自從內地嚴打色情行業，佢工作嗰間夜店亦因此而倒閉，令佢加入失業大軍，經濟隨之出現問題。

小楠話：「以前為咗方便返工，我喺重慶租咗一個單位居住，雖然租金唔算便宜，但當時喺夜場工作嘅薪水都算唔錯，足以應付開支，所以問題不大。但近年嚴打問題愈來愈嚴重，好多場都水盡鵝飛，有時坐足成日都冇一個客，家吓做開嗰間夜總會仲執埋笠。記得最倒楣嘅時候，就連交租錢都唔夠，真係好徬徨。初時我諗住去另一間夜總會度做，但咁啱遇着嚴打，喺無計可施之下，惟有出外搵其他工作。」

惡習難改

經朋友介紹下，小楠首次接觸保險行業，經過一輪培訓之後，如今着起行政套裝，每日朝早起身返工，雖然有啲唔習慣，但為咗搵食，不得不硬着頭皮去做。小楠表示：「以前喺夜總會返工，每日下晝先起身返工，天光至收工，而且打扮得愈性感愈好；呢份工就啱啱相反，要早睡早起，衣着要整齊大方，有次我見天氣熱，衫領扣少咗粒鈕，點知就畀啲經理話我有失斯文，唔夠專業，真係幾煩㗎！」

小楠為咗成為一位保險從業員，確實下咗唔少苦功，要改變衣着習慣及作息時間都唔係問題，但講到做事作風就難以改變！小楠續話：「我以前從未做過呢一行，又點會咁易搵到人買保單吖？如果每個月做唔夠一定單數，淨係靠底薪又點夠使？於是我惟有搵番以前嗰班熟客幫手。」小楠又表示曾試過為咗開單，主動向客人投懷送抱，但咁做似乎唔係好啱喎！

投懷送抱

小楠嘅做法的確有違業界操守，但佢就話咁做係迫不得已。小楠話：「開唔到單，就等於冇收入，仲會隨時冇咗份工。老實講，如果有得揀嘅話，試問有邊個女仔想賣肉維生吖？至於呢班客人以前都係經常嚟捧我場嘅。講真，呢班熟客咁有錢，叫佢哋買番一、兩份保單，根本唔成問題，不過，條件就係要我陪佢哋過夜。或者有人會認為我嘅做法唔啱，但家吓物價高漲，生活艱難，我實在好需要錢，惟有出此下策。」

小楠又話，現時唔少顧客都係由熟客介紹，除咗推銷保單之外，佢仲會照顧埋客人嘅生理需要，賣單之餘仲賣肉，所得收入同以前做三陪小姐差唔多，問到小楠有冇諗過放棄賣肉，做一個靠實力嘅保險從業員，佢就話：「曾經都有諗過，不過我諗要儲定一筆錢同做耐啲，儲到多啲客先可以囉！」

夜場小姐難轉行

喺內地，一旦入行當夜場小姐，通常都唔會咁易轉到行，除非好似上述嘅小楠咁，工作開嘅夜場結業，又搵唔到另一間較好嘅場，否則一般都會搵到夠皮先會考慮上岸，又或者儲一筆錢後，自己搞點小生意，再唔係就搵番個有錢老公。不過，喺內地打工仔嘅薪水不高，加上部分小姐學歷不高，難以搵到啱心水嘅工作，所以就算有意轉行，但最後都可能因為種種問題而走回舊路。