最近夜晚巡經旺角三街，即上海街、砵蘭街及新填地街，發現啲囡囡多到企滿街，呢邊有三、四個，嗰邊又有五、六個，情況十分熱鬧。我皮哥覺得好奇怪，點解啲馬伕咁夠膽，擺晒啲囡囡喺街，唔通唔怕畀人拉？
一位喺馬檻做持牌嘅老友坤叔就話：「鬼咩！家陣內地進行掃黃行動，大把囡囡冇嘢做，於是辦個證落嚟香港搵食囉！其實啲馬伕都唔想養咁多囡囡，點知啲囡囡話可以自己照顧自己，唔使馬伕養，總之有工開就拆鐘分錢，所以啲馬伕咪有咁多囡囡囉！」
但我質疑有冇咁多客人幫襯先？坤叔就話：「當然係冇咁多客人啦，事實上係囡囡多到連馬檻都唔夠畀佢哋坐，於是趕晒佢哋落街企囉！至於，佢哋又唔係做企街，唔理途人問價，只接Call上馬檻開工，你拉佢阻街咩！」原來係咁，難怪群鶯亂舞啦！
皮哥簡介
永遠二十五歲，經常喺油尖旺出沒，綽號蠱惑收料王，座右銘係唔八唔知天下事。
歡迎讀者爆料交流
爆料熱線：3600 6688
傳真：3600 6800
地址：香港大埔工業邨大昌街23號東方報業中心
電郵：happy.sup@org.com.hk