性學家指出，由於喺日常生活中，充滿刺激性、挑逗性及侵犯性嘅言語，當中好多都同性愛有關，所以人們一邊進行性愛活動，一邊講粗言穢語，自然會刺激到大腦，從而令情緒高漲。性學家又謂，基本上，當粗俗嘅說話融入性愛之中，就會轉化為一種聽覺刺激，情況就好似聽音樂，又或者聽到甜言蜜語一樣。

犯禁有快感

性學家表示，對於部分好顧體面、平時從來唔會講粗言穢語嘅人士嚟講，一句粗口，能夠讓佢哋體驗到正常生活中無法實現嘅快感，若然本身係一個道德觀念較重嘅人，呢種因犯禁所帶嚟嘅興奮快感就會更強烈，有時佢哋仲會要求伴侶亦使用同樣嘅表達方式，藉以提升興奮。

不屬於變態

性學家認為，交歡時所感受到嘅興奮快感，讓人嘅大腦皮層暫時或部分失去抑制作用，令一個人頓然失去自我監管能力，暫時放下心中道德枷鎖，於是乎，平日根本唔會講出嚟嘅粗言穢語就會衝口而出。同樣道理，喺性愛中不自覺講粗口嘅人，大概已經進入忘我境界。

當然，亦會有人刻意喺交歡時講粗口，目的通常係為咗助興而已，當中以成年男性居多。

可能大家會質疑，交歡時爆粗是否屬於一種性變態行為？性學家就指出，喺性變態表現中，的確存在一種穢語症，但其與性生活中講粗口，本質上存有區別，前者只係鍾意喺異性面前講污言穢語，並唔一定想發生性關係；後者則只限於交歡時出現，目的純粹為咗調情。

別強人所難

雖然每個人都有唔同嘅性喜好，但大家與伴侶交歡時，亦需要顧及對方感受。性學家提醒大家，如果男女雙方都可以接受呢種性愛方式，咁粗口就會成為性生活嘅興奮劑。相反，若然伴侶根本唔願意聽，但你仍然去講，只會令伴侶有一種受罪感覺，亦會失去性愛嘅歡娛感，除咗破壞性愛氣氛，影響雙方關係，更可能被伴侶懷疑自己係一個心理有問題嘅人。總之，只有坦誠溝通，至能夠讓雙方都感到舒服。