隔牆睇表演

而除咗睇脫衣舞外，仲有一種真人出浴騷，喺當時都十分流行，而且佢哋為咗避免有人嚟「收片」，大多數都會掛羊頭賣狗肉，其中最常見就係以冰凍汽水一蚊一支以作招徠。大家可能會話，一蚊支汽水咁平仲包睇騷？以家陣嘅物價嚟講當然平啦，但當年已經算好貴。事關嗰陣嘅汽水只係賣緊一毫子一支，而浸過雪水嘅所謂冰凍汽水，都只係賣兩毫。

如果有男人問收一蚊支汽水咁貴嘅時候？負責拉客嘅蛇仔就會笑淫淫咁講，包埋美女出浴騷，如果好奇嘅途人唔走開，蛇仔就會猛落嘴頭，大講出浴情節有幾咁香艷精彩。

當途人上當，蛇仔就會帶佢哋入去睇騷，而睇呢啲出浴騷嘅地方，通常就係各區嘅木屋區，以臨街較大嘅木屋為主。客人入到去，會有啲木板櫈，等大家先坐一坐，之後當然先收一蚊，然後送上冰凍嘅汽水，當等到有十零廿個客人坐定定，表演就會正式開始。不過唔係面對面咁睇，客人前面會有一道木板牆，上面開咗好多個窿，客人就由個窿望過去隔籬房，房內嘅燈光比較暗，設備好嘅就會播音樂，冇音樂嘅就可能會搵人即場講解。當音樂響起，所謂嘅美女就會出場，一般都係圍上浴巾或者着住浴袍。

高潮前中斷

美女一出場，佢嗰對豪乳如果唔可以令群眾譁然，咁就為之失敗，但一般客人都會嘩嘩聲咁叫，之後美人先扭幾扭，之後再慢慢走入木桶，開始浸浴。通常會攞住舊海綿或者一條小毛巾，上下左右咁擦，當然嗰招從水中踢隻腳出嚟「咪直」嘅動作一定要做啦！如是者十五分鐘過後，客人睇到喉乾舌燥，手中嘅汽水亦早已飲光，於是負責人就會宣布演出暫停，出浴嘅房間就會熄燈。如果客人意猶未盡，就要幫襯多一支汽水，冇錢畀嘅就要離場，冇得睇埋真人出浴嘅大結局喇！