紅牌由來

究竟「紅牌」點解可以解作最紅呢？話說紅牌出於古時嘅賭坊，呢啲場所都會有一個特別嘅地方招待大客，稱之為「樓上銀牌」，亦即係富貴兼有頭有面之人。既然係大客，賭注自然大，閒閒哋幾十斤、甚至幾百斤白銀都視作等閒。不過拎住咁重嘅白銀似乎太辛苦，亦容易惹起土匪注意，所以賭坊會先收下銀錢賭本，點數之後再發出「代碼」代替。

而「代碼」用錫鑄成，叫做「銀牌」。每一口投注都用相符嘅籌碼作表示，每次贏錢，賭坊都會攝一張紅紙喺賭客嘅銀牌下面，愈贏得多，攝嘅紅紙就愈多，久而久之，紅牌就有旺財嘅含意，之後再引申到最紅、被最多人點選嘅意思。

最紅姑娘

而大家喺電視、電影都聽唔少「紅牌阿姑」呢個名詞，咁點解又會有呢個叫法呢？原來昔日石塘咀嘅妓寨，門口掌櫃位後面都有一大塊木牌，上面掛滿竹牌仔，每個竹牌都寫上一位姑娘嘅藝名，被戲稱為「群芳譜」。如果該名姑娘畀客人點中及外出侍酒，妓寨掌櫃就會用硃砂筆喺該名姑娘嘅竹牌上點一點以作記錄。

所以，「紅牌阿姑」就代表咗姑娘好生意嘅意思。據了解，塘西全盛時期最著名嘅妓寨有四間，分別係歡得、賽花、詠樂及倚紅，而當時妓女中嘅「紅牌阿姑」，就有芊芊、素梅、金枝、盼如君及紫蘭花等多名。