講到香港嘅夜遊業，最早可以追溯到開埠初期，當年作為船隻中轉地嘅香港，有不少路經嘅水手及水兵，都會趁住難得上岸嘅機會，喺香港「洩慾」偷香一番。在十九世紀初，香港最為著名嘅紅燈區，一定係「塘西」。
銷金窩
對於「塘西」呢個名，年長嘅一輩可謂相當熟悉，事關當年有不少風流韻事，都同「塘西」呢個紅燈區扯上關係，而當年曾為梅艷芳奪得影后獎座的電影《胭脂扣》，亦係以「塘西」名妓作為故事題材。
當年嘅「塘西」，其實就係今日嘅石塘咀，範圍由卑路乍街與皇后大道西交界，一直延伸至嘉安街。早喺一九○三年，剛填海而成嘅石塘咀，仍然係一個荒蕪而偏遠嘅地方。當時香港第十三任港督彌敦，為咗發展石塘咀，於是下令將所有妓寨遷至該處，希望能夠刺激區內經濟發展。從呢個時候開始，本來荒蕪嘅石塘咀，便成為夜夜笙歌嘅不夜城。據講喺高峰時期，石塘咀有過百間妓院，及超過七十間大寨，妓女人數亦多達二千人。
逐漸式微
及至一九三五年時，由於港英政府立法禁娼，令「塘西」風月告一段落。不過，喺香港淪陷時期，石塘咀曾經出現鹹魚翻生嘅機會。當時日軍總督部頒令所有華人妓院，集中到石塘咀嘅「娛樂區」，並將石塘咀改名為「藏前區」，令石塘咀嘅風月場所，一時間火紅起嚟，共有大寨超過五百間，而呢個時候嘅大寨，一般都以日式裝潢為主。
但隨住時間推移，日本戰敗投降及港英政府繼續禁娼，石塘咀嘅風月事業正式宣告落幕，「塘西」風月亦成為歷史名詞。時至今日，石塘咀已不復當年男士銷金窩嘅面貌。